एम्बुलेन्स दुर्घटना हुदाँ एकको मृत्यु, अन्य तीन घाइते

झिलझिले,२ बैशाख । एम्बुलेन्स आफै अनियन्त्रित भई दुर्घटना हुदाँ झापाको शिवसताक्षीमा विहिबार विहान एक जनाको मृत्युभएको छ ।
शिवसताक्षी ११ दुधेस्थित सडकखण्डमा आज विहान करिब ४:२० बजे पूर्बबाट पश्चिमतर्फ आउदै गरेको ना. २१ च. ७९८४ नम्बरको एम्बुलेन्स आफैं अनियन्त्रित भई दुर्घटना हुदाँ त्यसका चालक ललितपुर,गोदावारी नगरपालिका ७ का ३० बर्षिय उत्सव घिमिरेको मृत्यु भएको हो । काठमाडौँको गोदावरीस्थित मेक्ससिटी अस्पतालबाट इलाम बिरामी पु¥याएर फर्किने क्रममा एम्बुलेन्स सडक छेउको रुखमा ठोक्किएको थियो ।
दुर्घटनामा गम्भिर घाइते उनलाई उपचारका लागि बिर्तामोडस्थित बिएण्डसी अस्पताल लैजाने क्रममा बाटोमै मृत्यु भएको जिल्ला प्रहरी कार्यालयका प्रवक्ता राकेश थापाले वताए । दुर्घटना परेर अर्का घाइते एम्बुलेन्सका सहचालक ३० बर्षिय सन्तोष तामाङको भने बिएण्डसी अस्पतालमा उपचार भइरहेको छ ।
त्यसैगरी झापाको कमल गाउँपालिका ५ स्थित रवि पेट्रोल पम्प नजिक पूर्व–पश्चिम लोकमार्गमा बुधबार साँझ पश्चिमवाट पुर्व आइरहेको ना.४ख ९१४६ नम्बरको खाली ट्रक र बिपरित दिशा पूर्ववाट पश्चिमतर्फ जादै गरेको मे.१प ९३१९ न. को मोटरसाइकल एकाआपसमा ठोक्किदा मोटरसाइकलमा सवार इलाम,चुलाचुली १ का १७ बर्षिय मंगलसिंह राई गम्भिर घाईते भएको प्रहरीले जनाएको छ ।
घाईतेको विराटनगरस्थित न्यूरो अस्पतालको भेन्टिलेटरमा राखेर उपचार भइरहेको इलाका प्रहरी कार्यालय दमकका डिएसपी नवराज कार्कीले जानकारी दिए । दुर्घटनामा मोटरसाइकल चालक चुलाचुली १ का २१ बर्षिय जर्मन लिम्बुको वाया हात, कुम र निधारमा चोट लागेको छ ।
प्रहरीले दुर्घटनामा संलग्न ट्रक र त्यसका चालक कमल ५ का ५० बर्षिय भक्ती प्रसाद नेपाललाई अनुसन्धानका लागि नियन्त्रणमा लिएको डिएसपी कार्कीले बताए ।