दमक,३० चैत। दमक नगरपालिकाले वास्तविक सुकुम्वासीलाई बसोबासको व्यवस्था मिलाउने भएको छ ।दमक नगरपालिकामा आइतवार पत्रकार सम्मेलनको आयोजना गर्दै नगरपालिकाले यस्तो प्रतिवद्धता जनाएको हो । नगरपालिकाको स्वामित्वमा रहेको जग्गामा बसोबास गर्दै आएका सुकुम्बासी तथा अति विपन्नहरुलाई बैकल्पिक घरको ब्यवस्था गर्न स्थानीय सरकार प्रतिबद्ध रहेको जनाएको हो ।
नगरपालिकाले पत्रकार भेटघाटमा नगर प्रमुख रोमनाथ ओलीले सुकुम्बासीको भावनामा खेलवाड गर्दै पछिल्लो समय नगरपालिकाको स्वामित्वमा रहेको जग्गामा बर्षौदेखि बनाइएको व्यक्तिका घर टहरा हटाएर खाली गराउने बिषयमा अवरोध नगर्न आग्रह गरे ।
२०७१ सालदेखि बारम्बार यस क्षेत्रका राजनीतिक दल एवम् पूर्व नगरप्रमुख एवम् जनप्रतिनिधिहरुले पटक–पटक नगरको सार्वजनिक जमिन संरक्षण गर्न सहमति जनाएको फेहरिस्त प्रस्तुत गर्दै नगर प्रमुख ओलीले आप्mनो प्रतिबद्धता र नगरस्तरमा भएको दलीय सहमति विपरीतका गतिबिधि नगर्न राजनीतिक दलहरुलाई आग्रह पनि गरे ।
प्रधानमन्त्री केपी शर्मा ओलीको नाम जोडेर प्रधानमन्त्रीको गृह नगरमा सुकुम्बासीहरुको घरमा डोजर लगाएको बिषय पछिल्लो समय सामाजिक सञ्जाल र कतिपय सञ्चारमाध्यमहरुमा एकोहोरो रुपमा आइरहेको प्रति नगरपालिकाको गम्भीर ध्यानाकर्षण भएको र वास्तविकता त्यस्तो नरहेको प्रमुख ओलीले तर्क गरे ।
उनले वास्तविक सुकुम्बासी घरवारविहीन भएको भए त्यस्तो परिवार अहिले पनि घर पाउँने र बसोबासको पूर्ण ग्यारेन्टी नगरपालिकाले गर्ने स्पष्ट पारे ।
बाहिर जग्गा जमिन एवम् घर भएर यहाँ ठाउँ ओगट्नेलाई नगरपालिकाले छुट्टै घर दिन नसक्ने तर वास्तविक रुपमा नै घर नभएका सुकुम्बासीलाई भने बसोबासका लागि आवासको बन्दोबस्त गरिने प्रमुख ओलीले बताए । घर तथा जमिन खाली गराउनका लागि बारम्बार सूचना निकालेर यहाँ बसोबासीहरुसंग छलफल गरेर नै खाली गराइएको बताउँदै कसैले पनि वास्तविकतालाई तोडमोड गरेर गैह्रजिम्मेवारीपन देखाउन नमिल्ने उनको धारणा छ ।
आधा दर्जनभन्दा बढी सुकुम्बासी घर परिवारहरु एक बर्षअघि नै नयाँ बस्तीमा बनेको घरमा गएर बसेको र केहीले आफै व्यवस्थापन हुने भनेपछि आर्थिक सहयोग समेत नगरपालिकाले गरेको उपप्रमुख गीता अधिकारीले बताइन् । हामीले घर बस्न चाहनेलाई नमूना बस्तीमा घर र नचाहनेलाई घरभाडा बापत रकम पनि दिएका छौं– उपप्रमुख अधिकारीले भनिन् ।
अधिकारीले बारम्बारको सबैको आग्रह अनुसार नै सार्वजनिक सम्पत्ति संरक्षणको दायित्वलाई सम्झेर अहिले अतिक्रमित क्षेत्र खाली गराउन खोजिएको जिकिर गरिन् ।
वास्तविक सुकुम्बासीहरुको ब्यवस्थापन हाम्रो अर्थात् स्थानीय सरकारको दायित्व हो र हामी यसबाट भाग्दैनौं– उनले भनिन् । उनले दमक–७ स्थित हाल खाली गराइँदै गरेको क्षेत्रमा बन्ने नयाँ सपिङ कम्प्लेक्समा सोही ठाउँमा यस अघि व्यवसाय गरेर बसेका व्यवसायीहरुलाई नै पहिलो प्राथमिकता दिइने उपप्रमुख अधिकारीले बताइन् ।
