दमक,९ असोज । क्यान्सर रोगबाट ज्यान गुमाएका साहित्यकार भिम ईजम (लुङमाहिम काईंला ) को कृति ‘मिक्वा’ गजल संग्रहको आज यहाँ लोकार्पण गरिएको छ ।
ताप्लेजुङको पाथिभरा याङवरक गाउँपालिका घर भई मोरङको पथरीशनिश्चरेमा बस्दै आएका साहित्यकार ईजमको अन्तिम कृति गजल संग्रह मिक्वाको साहित्यकार देवी पन्थी र सुमित्रा वाङदेल चेलीले संयुक्त रुपमा लोकार्पण गरे ।
टाँडी कुञ्ज परिवार मिक्लाजुङ मोरङको आयोजनामा भएको कार्यक्रममा साहित्यकारहरु विवस बलिभद्र कोईराला र सुन्दर कुरुपले गजलकार ईजमको कृति र व्यक्तित्वमाथि चर्चा गरेका थिए ।
जीवनको छोटो समयमै उत्कृष्ठ सृजनाहरु पस्किएका ईजमले जटिल रोगका कारण आफु मर्दैछु भन्ने थाहा पाउँदै गरेको अवस्थामा पनि लेखेका गजलहरु निक्कै मार्मिक भएको उनीहरुको टिप्पणी थियो ।
टाँडी कुञ्जका अध्यक्ष गगन योक्पङदेनको अध्यक्षतामा भएको कार्यक्रममा साहित्यकारहरु मञ्जु थेगिम, दिलिप सगर, लोकेन्द्र बन्जरा लगायतले गजल संग्रह मिक्वा भित्र रहेका गजलहरु वाचन गरेका थिए । लिटरेरी ग्रुप दमक, शब्दखिम धरमपुर, गजलघर दमक र मिक्लाजुङ साहित्य समाज मोरङ लगायतका साहित्यक संघसंस्थाहरुको सहकार्यमा कार्यक्रम सम्पन्न भएको साहित्यकार राजकुमार सुब्बा (अनिश्चित ) ले जानकारी दिए ।
