शिवसताक्षी, १५ फागुन । झापाको शिवसताक्षीमा फागुन १७ गते देखि २८ गतेसम्म सञ्चालन हुन गइरहेको तेश्रो मेयरकप खेलकुद प्रतियोगिताको सम्पूर्ण तयारी पूरा भएको छ । ८ विद्याका १९ वटा खेल नगरका विभिन्न खेल मैदान तथा कवर्डहलमा हुने प्रतियोगिताको तयारी पूरा भएको आयोजक शिवसताक्षी नगर खेलकुद विकास समितिले जनाएको छ ।
आयोजक शिवसताक्षी नगर खेलकुद विकास समितिका अध्यक्ष फुर्वा तामाङ्गका अनुसार प्रतियोगितामा फुटबल, भलिबल, एथलेटिक्स, क्रिकेट, कराँते, कबड्डी र व्याडमिण्टनका खेल हुनेछन् । प्रतियोगिता अन्तर्गत नगर स्तरिय फुटबलका बिजेताले ७५ हजार र उपविजेताले ४१ हजार नगदसहित मेडल, ट्रफि र प्रमाणपत्र पाउने छन् ।
त्यस्तै,फुटबल विद्याका सर्वोकृष्ट खेलाडीले १५ हजार र म्यान अफ दि म्याचका विजेताले १४ हजार पाउने छन् । प्रतियोगितामा सर्वाधिक गोल गर्नेले ८ हजार पाउने आयोजक समितिका सन्तोष पौडेलले बताए । वेष्ट किपर, डिफेन्स, मिड फिल्डर, स्ट्राईकरले जनही ५ हजार पाउने छन् । फुटवल दुधेको क्षेत्रीय रंगशालामा हुने छ ।
यस्तै भलिबल खेलमा विजेता वडाले ५० हजार पुरस्कार पाउने छ भने उपविजेताले ३० हजार पाउने छ । पारावारीको खेलमैदानमा हुने सो खेल १८ गते देखि हुने र भलिबल खेलका म्यान अफ दि म्याचको उपाधि पाउने खेलाडीले १४ हजार र वेष्ट प्लेयरले ७ हजार पाउने छन् ।
यता महिला तथा पुरुष दुवैको एथलेटिक्सि प्रतियोगिता भने २२ गते देखि हुने भएको छ । व्याङ्गडाँडामा हुने उक्त प्रतियोगिता ८ सय देखि ३ हजार मिटर दुरी सम्मको हुने छ । आयोजकका अन्ुसार छेलो खेलमा महिला पुरुष दुवैले सहभागिता जनाउने छन् । लङ जम्प महिला—पुरुष र हाईजम्पमा महिला मात्र सहभागि हुने छन् । एथलेटिक्स खेलका लागि आयोजकले ६३ हजार ५ सय पुरस्कार राशी छुट्याएको छ ।
मेयरकप अन्तर्गत क्रिकेट खेल १९ गते देखि झिलझिलेस्थित खेलमैदानमा हुने छ र बिजेताले ५० हजार र उपविजेताले ३० हजार पाउने छन् । क्रिकेटको म्यान अफ दि म्याच १४ हजार, म्यान अफ दि सिजिर ३ हजार र वेष्ट अफ दि खेलाडीले ५ हजार पाउने आयोजकले जानकारी दिएको छ ।
मेयर कपमा कराँते खेल पनि हुने छ । कराँते महिला र पुरुष दुबैको फरक फरक हुने छ । माईधारको कवर्ड हलमा २२ गते देखि हुने उक्त प्रतियोगिताका बिजेताले २० हजार पाउने समितिका प्रेम फुँयलले बताए । आयोजकका अनुसार कबड्डी २६ गते देखी र बुद्धिचाल पनि २० गते देखी दुधेमा हुने छ । कबड्डीका बिजेताले १५ हजार र उपविजेताले १० हजार पाउने छन् । यस्तै बुद्धिचालका बिजेताले क्रमश १० हजार, ७ हजार र ५ हजार नगद पुरस्कार पाउने छन् ।
यता व्याडमिन्टन तर्फको खेल माईधारमा हुने छ । सो विधाका डवल खेडाली बिजेताले १० हजार र सिङगल बिजेताले ५ हजार पाउने छन् । यस्तै दोश्रो डवल बिजेताले ५ हजार र दोश्रो सिङगल बिजेताले ३ हजार पाउने छन् ।
शिवसताक्षी नगरपालिकाले मेयर कपलाई मिनि ओलम्पिकको उपमा दिएको छ । चालु आर्थिक वर्ष ०७७÷०७८ मा १५ लाख रकम विनियोजन गरेको थियो । गत वर्ष कारोना भाईरसका कारण रोकिएको उक्त प्रतियोगिता फेरी सञ्चालनको तयारी भएको शिवसताक्षी नगरका प्रमुख चन्द्रकुमार शेर्माले बताए । आयोजकले सबै विधाका खेलमा ५ लाख २९ हजार ५ सय पुरस्कार राशी छुट्याएको छ ।
