विराटनगर । क्यान महासंघ मोरङ शाखाले आउँदो पुस १९ गतेदेखि ५ दिनसम्म प्रदेशस्तरीय क्यान इन्फोटेक २०१९ गर्ने भएको छ ।
क्यान मोरङ शाखाले आज विराटनगरमा पत्रकार सम्मेलन गरी इन्फोटेक गर्ने जानकारी गराएको हो । क्यान माहासंघ र लिभिङ विथ आइसिटीको सहयोगमा हुने इन्फोटेकमा आइसिटी कन्फरेन्स, सोसल मुभमेन्टलगायतका कार्यक्रमहरुमार्फत आइसिटी क्षेत्रमा आएका नयाँ नयाँ प्रविधिको जानकारी, प्रशिक्षण पनि संचालन हुने क्यान मोरङ मोरङका अध्यक्ष राजन प्रसाद यादवले जानकारी दिनुभयो ।
पत्रकार सम्मेलनमा कम्युटर एसोसिएसन महासंघका महासचिव डाक्टर पवन कुमार शर्माले इन्फोटेकले विराटनगरलाई बिजनेस हवको रुपमा विकास गर्ने गरी सहयोग गर्ने बताउनु भयो ।
इन्फोेटेकमा १ सय २० वटा विभिन्न स्टल रहने र ४ लाख मानिसले अवलोकन गर्ने आयोजकको अपेक्षा छ । ८० लाख खर्च हुने अनुमान गरिएको इन्फोटेकमा ५ करोड बराबरको कारोबार हुने अपेक्षा गरिएको क्यान मोरङले जनाएको छ । १ नम्बर प्रदेशमा क्यानका ५ सय बढी सदस्य रहेका छन् ।
